ရင်ဆိုင်ကြရဦးမယ့် ၂၀၁၄ စိန်ခေါ်မှုများ

စာရေးသူ၏ (၆)ပုဒ်မြောက် နိုင်ငံရေးဆောင်းပါး။ ၁၆-၁-၂၀၁၄ နေ့ထုတ် the Politics ဂျာနယ် အမှတ်(၂၆)မှာ ပုံနှိပ်ဖော်ပြပါရှိလာသော"ရင်ဆိုင်ကြရဦးမယ့် ၂၀၁၄ စိန်ခေါ်မှုများ" ဆောင်းပါးဖြစ်ပါတယ်။

အခုဆိုရင် ၂၀၁၄ နှစ်သစ်ကိုရောက်လာခဲ့ပါပြီ။ ဧရာဝတီမြစ်ဆုံကိစ္စကြီးလည်း ငြိမ်သက်နေရာကနေ တစ်စခန်းထ လာပြန်ပါတယ်။ ဆီးဂိမ်းအပြီး ထွက်ပေါ်လာတဲ့ အဲ့ဒီသတင်းက ဧရာဝတီချစ်သူများကို လှုပ်နှိုးလိုက်ပြန်ပါပြီ။ ဧရာဝတီဆိုတာ မြန်မာပြည်ရဲ့ အသက်သွေးကြော၊ မြန်မာ့ရာဇဝင်ထဲက သတို့သမီး။ ဆီးဂိမ်းကိုဗန်းပြပြီး အားနာကြေးကို ဧရာဝတီနဲ့ ပေးဆပ်ရမယ် ဆိုရင်တော့ နဲနဲလေးမှ သည်းခံနိုင်မှာ မဟုတ်ပါဘူး။ ကျွန်တော်တို့ပြည်သူတွေဟာ ဧရာဝတီကို အသက်တမျှချစ်ကြသူတွေပါ။ ဧရာဝတီကို ကာကွယ်ကြမယ့်သူတွေပါ။ ဒါကြောင့်လဲ တစ်ချိန်က တစ်နိုင်ငံလုံး save Arrawaddy ဆိုပြီး ဝိုင်းလုပ်လိုက်ကြတာ စီမံကိန်းကြီးရပ်ခိုင်းရတဲ့အထိ အောင်မြင်မှုရခဲ့ပါတယ်။ အခုလည်း ထိုနည်း၎င်း ဝိုင်းလုပ်ကြရဦးမယ်ထင်ပါတယ်။ ဒီတစ်ခါဆိုရင်တော့ တိုင်းပြည်ငြိမ်သက်အောင်ထိန်းဖို့ တော်တော်မလွယ်လောက်တော့ပါဘူး။ ပေါက်ဖော်မုန်းတီးရေးတွေပါ ပါလာနိုင်ပါတယ်။ ကြေးစင်တောင်ကိစ္စမှာကတည်းက မကျေနပ်နေကြတဲ့ ပေါက်ဖော်မုန်းတီးမှုတွေ ရောပြွန်းလာနိုင်ပါတယ်။

ဧရာဝတီနဲ့ပြည်သူကို ကိုင်လှုပ်လို့မှမဝသေး ဟောတစ်ခါ လာပြန်ပြီ။ အာဇာနည်ကုန်းကိစ္စ။ အာဇာနည်ကုန်းဆိုတာ ကျွန်တော်တို့အမျိုးသားခေါင်းဆောင်ကြီးတွေကို တလေးတစားမြုပ်နှံထားတဲ့နေရာပါ။ မြန်မာ့အာဇာနည်ကြီးများ ထားတဲ့နေရာမို့ အာဇာနည်ကုန်းလို့ခေါ်တာပါ။ အဲ့ဒီနေရာမှာ တိုင်းတစ်ပါးကလူတွေအတွက် ဗိမာန်လာဆောက်မယ်ဆိုတာကတော့ ကျွန်တော်တို့အထွတ်အမြတ်ထားတဲ့နေရာမို့ လက်ခံနိုင်စရာအကြောင်း မရှိပါဘူး။ နှစ်နိုင်ငံ ချစ်ကြည်ရေးတွေ၊ မိတ်မပျက်ရေးတွေကို ငဲ့ကွက်ထောက်ထားပြီး ပေးလုပ်ချင်သပဆိုရင် သီးသန့်နေရာလွတ်တစ်ခု ရှာပြီး ပေးလုပ်လိုက်ပါ။ ကျွန်တော်တို့ခေါင်းဆောင်ကြီးတွေနဲ့တန်းတူတော့ ဘယ်လိုနည်းနဲ့မှ အတူတူမထားနိုင်ပါဘူး။ ဒီ့အတွက်လဲ လူထုက ဆန္ဒတွေဖော်ထုတ်လာကြရဦးမယ်။ ဆိုင်းဘုတ်တွေကိုင် စီတန်းလှည့်လည်ကြရဦးမယ်။ အဲ့ဒီအခါ ပုဒ်မ(၁၈)ဆိုတာကြီးနဲ့ ပြန်ပြီးငြိကြရဦးမယ်။  လူထုကို လမ်းပေါ်မထွက်ထွက် အောင်များ လုပ်နေကြရော့သလား တွေးမိပါတယ်။ 

သူတို့သူတို့တွေဟာ ဘာကြောင့်များ မြန်မာပြည်သူပြည်သားတွေရဲ့ အထင်ကရ အလေးအမြတ်ထားတဲ့ အရာတွေကို ဖြစ်ကလဲ့ဆန်းလုပ်ပစ်ချင်ကြရတာလဲ။ အဲ့ဒီနေရာတွေ အဲ့ဒီအရာတွေဟာ သူတို့ချည်းပဲပိုင်တာလား။ သူတို့ချည်းပဲ လုပ်ချင်တာလုပ်နိုင်တဲ့အရာတွေလား။ အဲ့ဒါတွေဟာ အစိုးရပိုင်တွေမဟုတ်ပါဘူးဗျာ။ ဧရာဝတီမြစ်ကြီးရော၊ အာဇာနည်ကုန်းကြီးရောဟာ ကျွန်တော်တို့ မြန်မာတစ်မျိုးသားလုံး၊ တိုင်းရင်းသားညီအစ်ကိုမောင်နှမများအားလုံး ပိုင်ဆိုင်တဲ့ နိုင်ငံပိုင်၊ ဘိုးဘွားပိုင်တွေပါ။ ခေတ်အဆက်ဆက် မျိုးဆက်သစ်တွေလဲ ပိုင်ဆိုင်သွားကြရဦးမယ့် သမိုင်းဝင်နေရာတွေပါ။ ပြည်သူ့သဘောတူညီမှုမပါပဲ ကိုယ်လုပ်ချင်တာလုပ်မယ်ဆိုတဲ့စိတ်ရှိနေသေးရင် အာဏာရှင် ဖြစ်နေဦးမှာပါပဲ။

အခုဆိုရင် နိုင်ငံရေးအခင်းအကျင်းတွေဟာ စိုးရိမ်ရေမှတ်ကိုရောက်နေခဲ့ပါပြီ။ မန္တလေးမြို့လယ်ခေါင်က မောင်ကိန်းရွှေဆိုင်ကို သေနတ်ပြပြီး ဓါးပြဝင်တိုက်လိုတိုက်၊ လားရှိုးက လူနေအိမ်တစ်အိမ်ကိုဝင်ပြီး အနုကြမ်းစီးဖို့ ကြိုးစားလိုကြိုးစား၊ အဆိုတော်ကောင်းမြတ်လေးအဖေရဲ့ကားကို နေ့ခင်းကြောင်တောင် လုပြေးလိုလုပြေး၊ ဒါတွေကို ကြည့်ရင် လုံခြုံရေးအားနည်းနေတာကိုတွေ့ရမှာပါပဲ။ လုံခြုံရေးအားနည်းချက်ရှိနေလို့ အခုလို ဖြစ်ချင်တိုင်းဖြစ်နေကြတာ ပါ။ ပြည်သူတွေမှာတော့ ကျီးလန့်စာစားနေကြရဆဲပါပဲ။ အရှေ့ပူရ၊ အနောက်ပူရနဲ့ လူတွေလည်း အပူလုံးကြွပြီး လူလုံးမလှ ဖြစ်နေကြရပါပြီ။ တခါ ဘင်္ဂါလီတွေဝိုင်းနှက်လို့ ရဲတစ်ယောက်သေပြီး တစ်ယောက်အတွင်းလူနာဖြစ်သွားတာ ကို ကြားရပြန်တော့ အော်…လူနည်းစု လူနည်းစုလို့ ကမ္ဘာမှာ တွင်တွင်ကျယ်ကျယ်အော်နေတဲ့သူတွေဝိုင်းရိုက်လို့ သေရတာက လူများစုထဲကပါလားဆိုပြီး ဘာဆက်ပြောလို့ပြောရမှန်းတောင် မသိတော့ပါဘူး။ ဟိုတစ်လောကလဲ ရန်ကုန်မြို့ထဲ လိုင်စင်မဲ့ဆိုင်ကယ်တွေ လိုက်ဖမ်းတဲ့ စစ်ဆေးရေးအဖွဲ့ကို ဆိုက်ကယ်သမားတွေက တိုက်ခိုက်တဲ့ သတင်းကြားရပါသေးတယ်။ လုံခြုံရေး အားနည်းရတဲ့အထဲ လုံခြုံရေးတာဝန်ယူနေတဲ့ ရဲတွေ၊ စည်းကမ်းထိန်းသိမ်း ပေးနေတဲ့သူတွေကို အခုလို အသတ်ခံရ၊ တိုက်ခိုက်ခံရပြန်တော့ မြန်မာပြည်နဲ့ဒီမိုကရေစီ ဘယ်လိုခရီးနှင်ရ မလဲတွေးကြည့် မိပါတယ်။ 

တိုင်းပြည်တည်ငြိမ်အေးချမ်းနေဖို့ အခြေခံလူတန်းစားတွေရဲ့ စားဝတ်နေရေး အဆင်ပြေအောင် ဖန်တီးပေး ဖို့ကလဲ အဓိက အချက်တစ်ချက်ဖြစ်ပါတယ်။ အခြေခံလူတန်းစားတွေမှာ စားဝတ်နေရေး အဆင်မပြေကြတဲ့ အခါ အခုလို လုယက်၊ ခိုးယူ၊ ဓါးပြတိုက်၊ အနုကြမ်းစီး စတဲ့ ဒုစရိုက်မှုတွေ ဖြစ်နေဦးမှာပါပဲ။ အသိဥာဏ်ဖွံ့ဖြိုးမှု အားနည်းနေသေးသရွေ့ မုဒိန်းမှုတွေ၊ လူသတ်မှုတွေ ကျူးလွန်နေကြဦးမှာဖြစ်ပါတယ်။ မြန်မာပြည်သူတွေအတွက် ၂၀၁၄မှာ ဘယ်လိုပြုပြင်ပြောင်းလဲမှုတွေလုပ်ပေးရမလဲ သက်ဆိုင်ရာက စီမံကိန်းတွေချမှတ်ဖို့ကောင်းပြီ။ စားဝတ်နေရေး ပြေလည်အောင် ဝန်ထမ်းလစာတွေတိုးပေးတာမျိုး၊ ကုန်ဈေးနှုန်းတွေ ထိန်းပေးတာမျိုး၊ အသိဥာဏ်ဖွံ့ဖြိုးအောင် ပညာပေးလုပ်ငန်းတွေလုပ်တာမျိုး၊ အဲ့ဒီနေရာမှာ တစ်ပတ်စီမံချက်၊ တစ်လစီမံချက်နဲ့လုပ်ပြ၊ တစ်ပတ်ကျော်တော့၊ တစ်လကျော်တော့စီမံချက်လဲပျောက်၊ ဖြစ်ချင်တိုင်းလဲပြန်ဖြစ်ဆိုတာမျိုး မရှိသင့်တော့ပါဘူး။ ဥပမာ မုဒိန်းမှုကျူးလွန်ရခြင်းရဲ့အဓိကဟာ ဘာလဲ၊ လုယက်ဓါးပြတိုက်မှုရဲ့အဓိကဟာဘာလဲ သေချာလေ့လာစုံစမ်းပြီးရင် အဲ့ဒီလိုမဖြစ်ရအောင် ဘယ်လိုကာကွယ်ရမယ်၊ ဘယ်လိုထိန်းသိမ်းရမယ်ဆိုတာကို ပညာပေးဖို့အရေးကြီးပါတယ်။ ပြီးရင် ထိရောက်တဲ့ အပြစ်ပေးမှုမျိုးလည်း ရှိဖို့လိုပါတယ်။ မြန်ဆန်မှန်ကန်တဲ့ အရေးယူမှုမျိုး ဖြစ်ဖို့လည်းလိုပါတယ်။ ရခိုင်ကျောက်နီမော်က မသီတာထွေးအမှုတုန်းကလည်း မြန်မြန်ဆန်ဆန်နဲ့ မှန်မှန်ကန်ကန်သာ အရေးယူအပြစ်ပေးမှုလုပ်နိုင်ခဲ့ရင် နောက်ဆက်တွဲ ဆိုးကျိုးတွေ ဖြစ်လာစရာအကြောင်း မရှိပါဘူး။ အဲ့ဒီလို မရှိခဲ့လို့ မြန်မာပြည်မှာ လူမျိုးရေး၊ဘာသာရေးအဓိကရုဏ်းတွေ မဖြစ်သင့်ပဲဖြစ်လာခဲ့ရတာပါဘဲ။

နက္ခတ်တာရာတွေကိုကြည့်ပြီး ဟောကိန်းထုတ်ချက်တွေအရကလည်း ၂၀၁၄ခုနှစ်အတွင်း မြန်မာပြည်မှာ ဆူပူလှုပ်ရှားမှုတွေဖြစ်လာမယ်၊ မတည်မငြိမ်ဖြစ်လာမယ်၊ အဓိက ကတော့ မင်းပြောင်းမင်းလွဲ ဖြစ်နိုင်တယ် ဆိုတဲ့ တွက်ကိန်းဟောကိန်းတွေ ထွက်ပေါ်လျက်ရှိပါတယ်။ မင်းပြောင်းမင်းလွဲဖြစ်နိုင်တယ်ဆိုတဲ့အချက်က လူတွေကို ပိုပြီး စိတ်ဝင်စားစေခဲ့ပါတယ်။ မင်းပြောင်းမင်းလွဲဆိုတာ ခေါင်းဆောင်အပြောင်းအလဲ ဖြစ်မယ့်သဘောပေါ့။ ဒါဆို ကျွန်တော်တို့သမ္မတကြီးက ထိုင်ရာကနေ ဖယ်ပေးရတော့မှာလား။ နှလုံးစက်တပ်ထားရလို့ ကျန်းမာရေးကိုအကြောင်းပြပြီး ရာထူးကနေ နားသွားမှာလား။ အင်း…မကြံကောင်းမစည်ရာ လုပ်ကြံခံရလို့ပဲ ကံတော်ကုန်သွားမှာမို့လား အမျိုးမျိုးတွေးနေ ပြောနေကြတာ ကြားနေရပါတယ်။ မင်းဆိုကတည်းက ဒီနိုင်ငံရဲ့အကြီးအကဲဟာ သမ္မတကြီးပဲရှိတာဆိုတော့ ဒီလိုပဲ ပြောကြဆိုကြမှာပေါ့။ ဘာပဲပြောပြော ယတြာဗေဒင်ကောင်းတဲ့ မြန်မာပြည်ခေါင်းဆောင်အဆက်ဆက်မို့ ဒီဟောကိန်းကို သူတို့ဘယ်လို ကျော်ဖြတ်မလဲဆိုတာကတော့ ငွေရောင်ပိတ်ကားမှာ စောင့်ကြည့်ရဦးမှာပဲ။ 

တစ်ခုတော့စဉ်းစားမိတယ်။ ပြောရမှာလား အားနာတယ်။ မင်းပြောင်းမင်းလွဲဆိုပြီး တပ်မင်းကြီး အပြောင်းအလဲ ဖြစ်သွားတာမျိုးရော မဖြစ်နိုင်ဘူးလို့ ဘယ်သူပြောနိုင်မလဲ။ တပ်မင်းကြီးက ပင်စင်နားနီးပြီဆိုတော့ အနားယူကောင်း ယူသွားနိုင်တယ်လေ။ အနားယူပြီးရင်လည်း သူလည်း ဘဘစိန်လို ဘောင်းဘီချွတ် ပုဆိုးဝတ်လိုက်နိုင်တာပဲ။ ရွေးကောက်ပွဲကလည်း နီးပြီမဟုတ်လား။ ဒီတော့ ၆၉နှစ်မြောက် တပ်မတော်နေ့ဟာ တပ်မင်းကြီးရဲ့ နောက်ဆုံးမိန့်ခွန်းပြောတဲ့နေ့လဲ ဖြစ်နိုင်ပါတယ်။ ဒါမှမဟုတ် တပ်မတော်နေ့မတိုင်ခင်ပဲ အပြောင်းအလဲနဲ့ တွေ့ရမလားဆိုတာကတော့ ကျွန်တော်တို့ စောင့်ကြည့်ရမှာပါ။ ဒီလိုဆို ဂြိုလ်နက္ခတ်တွေနဲ့တွက်ကိန်း ဟောကိန်း မှန်ကောင်း မှန်သွားနိုင်ပါတယ်။ မင်းပြောင်းမင်းလွဲဖြစ်မယ်ဆိုတာက တပ်မင်းကြီးအပြောင်းအလဲနဲ့ အစားထိုးသွားနိုင်ပါတယ်။ ဒါက ကျွန်တော့်အမြင်ပါ။ မှန်ချင်မှလည်းမှန်မယ်။ မှားချင်မှလည်းမှားမယ်။

          အဲ့ဒါတွေအားလုံးထဲမှာ ကျွန်တော်အစိုးရိမ်ဆုံးတစ်ခုကတော့ လူထုခေါင်းဆောင်၊ ဒီမိုကရေစီဘုရင်မ ဒေါ်အောင်ဆန်းစုကြည်ရဲ့ လုံခြုံရေးပဲဖြစ်ပါတယ်။ အမေစုဟာ ပြည်သူတွေရဲ့ ရင်ထဲ အသည်းထဲက တင်မြှောက်ထားတဲ့ ဘုရင်မ၊ တစ်နည်း မြန်မာပြည်ရဲ့မင်းတစ်ပါးလည်း ဖြစ်ပါတယ်။ အမေစုဟာ မြန်မာပြည်ရဲ့မျှော်လင့်ချက်။ မြန်မာပြည်သူ ပြည်သားတွေရဲ့အားကိုးရာပါ။ အဲ့ဒီလို တိုင်းပြည်အတွက် အထူးအရေးပါတဲ့ပုဂ္ဂိုလ် အမေစု ၂၀၁၅ မတိုင်မီ ဘာမှ မဖြစ်ဖို့ အရေးကြီးပါတယ်။ ပါကစ္စတန်က ဘာနာဇာဘူတိုလို အဖြစ်မခံနိုင်ပါဘူး။ ၂၀၁၄ ဟောကိန်း မင်းပြောင်းမင်းလွဲဆိုတာဟာ အမေစုအတွက် မဖြစ်အောင် လုံခြုံရေးသတိ အထူးရှိကြဖို့လိုအပ်လာပါပြီ။ ပြည်သူချစ်သော ပြည်သူကချစ်သော ခေါင်းဆောင်များဟာ ပြည်သူကို ယုံကြည်လွယ်တတ်ကြပါတယ်။ အဲ့ဒီလို ယုံကြည်လွယ်ခဲ့လို့လည်း ဗိုလ်ချုပ်အောင်ဆန်းတစ်ယောက် ရေတိမ် နစ်ခဲ့ရပြီးပါပြီ။ နောက်တစ်ခါ ဒီလိုအဖြစ်ဆိုးမျိုး မကြုံချင်တော့ပါဘူး။ အမေစုမှ မဟုတ်ပါဘူး။ မြန်မာပြည်ရဲ့ခေါင်းဆောင် အားလုံးကို မဖြစ်စေချင်၊ မကြုံစေချင်ပါဘူး။ မြန်မာ့နိုင်ငံရေး အသွင်ကူးပြောင်းမှုမှာ သွေးထွက်သံယိုမှုတွေမပါဘဲ ငြိမ်းချမ်းတဲ့နည်းလမ်းနဲ့ အဖြေရှာ ပြောင်းလဲသွားစေချင်ပါတယ်။

မြစ်ဆုံစီမံကိန်း၊ အာဇာနည်ကုန်းကိစ္စတွေနဲ့ ပြည်သူကို သွေးဆူအောင် မလုပ်ကြပါနဲ့။ ပြည်သူတွေကို တန်ဖိုးထားတဲ့ အစိုးရမှန်ရင် ပြည်သူ့အသံစစ်စစ်ကို နားထောင်ဖို့လိုအပ်ပါတယ်။ နေရာအနှံ့မှာဖြစ်နေတဲ့ အနုနည်း၊ အကြမ်းနည်း ဒုစရိုက်မှုတွေဟာလည်း ပြည်သူကို ထိတ်လန့်နေစေခဲ့ပါတယ်။ လက်ရဲဇက်ရဲ၊ လူမိုက်တွေကို လက်သတ်မွေးပြီး အဓိကရုဏ်းတွေဖန်တီးတာမျိုး၊ တိုင်းပြည်မတည်မငြိမ်ဖြစ်အောင် ဆူပူအုံကြွတာမျိုး၊ လုံခြုံရေးအားနည်းလို့ စိုးရိမ်ထိတ်လန့်နေရတာမျိုးတွေမရှိအောင် ဘယ်လိုဖြေရှင်းကြမလဲ။ တစ်ဦးကောင်း တစ်ယောက်ကောင်းရုံနဲ့ နိုင်ငံကောင်း ဖြစ်မလာနိုင်ပါဘူး။ နိုင်ငံသူနိုင်ငံသား အားလုံးကောင်းမှသာ နိုင်ငံကောင်းတစ်ခု ဖြစ်လာမှာပါ။ 

ဒါကြောင့် ၂၀၁၄ခုနှစ်မှာ တပ်တွင်းအပြောင်းအလဲကြီးတွေဖြစ်လာမယ်ဆိုရင်လဲ သေနတ်သံတစ်ချက် မဖောက်လိုက်ရဘဲ အေးအေးဆေးဆေး ပြောင်းလဲနိုင်ပါစေ၊ မင်းပြောင်းမင်းလွဲဆိုတာကြီး တကယ်ဖြစ်လာမယ်ဆိုရင်လဲ ကောင်းမွန်တဲ့အပြောင်းအလဲမျိုးဘဲ ဖြစ်ပါစေ၊ ပြည်သူတွေလည်း စားဝတ်နေရေး အခက်အခဲ အကြပ်အတည်းတွေကနေ အမြန်ဆုံးလွတ်မြောက်နိုင်ကြပါစေ၊ ဖွဲ့စည်းပုံအခြေခံဥပဒေကြီးလည်း ပြည်သူတို့ဆန္ဒနဲ့ တစ်ထပ်တည်းကျတဲ့ ပြုပြင်ပြောင်းလဲ ရေးဆွဲမှုကြီး ဖြစ်လာနိုင်ပါစေ၊ ရန်ကုန်မြို့တော်ကြီးရဲ့ လမ်းတိုင်းလမ်းတိုင်း ယာဉ်ကြောပိတ်ဆို့ လမ်းကြပ်သည့်ဒုက္ခများမှ သွားလာလှုပ်ရှားနေကြသူတွေ အမြန်ဆုံး လိုရာခရီးပန်းတိုင်သို့ ချောချောမောမေ ရောက်နိုင်ကြပါစေ၊ အပစ်အခက်ရပ်စဲရေး၊ ငြိမ်းချမ်းရေးဆွေးနွေးပွဲတွေလည်း ဒီနှစ်မှာ အထမြောက်အောင်မြင်ပြီး ပြည်ထောင်စုငြိမ်းချမ်းရေးလက်မှတ်ရေးထိုးပွဲကြီး ဖြစ်ပေါ်လာနိုင်ပါစေ၊ နောက်ဆုံး ခြသေ့င်္နှစ်ကောင်တံခါးကြီး ပြန်ပွင့်သွားပြီမို့ အစဉ်အလာကြီးမားသည့် ရန်ကုန်တက္ကသိုလ်ကြီးမှ ထူးချွန်ထက်မြက်သည့် အနာဂတ် မျိုးဆက်သစ် နိုင်ငံရေးခေါင်းဆောင်များ မွေးထုတ်ပေးနိုင်ပါစေလို့ ဆန္ဒပြုမျှော်လင့်လျက်။

ဝေဖြိုးဟန်(အင်းစိန်)